L. B. S. Annus jam agitur vigesimus, ex quo tabulis meis synopticis historiam doctrinarum medicarum complectentibus parvum omnino et mancum addebam catalogum librorum proprie ad historiam medicinae pertinentium. Inde neque tempori neque sumtibus peperci, ut pleniorem et accuratiorem adipiscerer cognitionem ejusmodi librorum et ut plenius aliquid et concinnius tradere possem iis, qui haec studia non obiter et perfunctorie, sed profundius et subtilius tractare consueverint. Jam cum in eo sim, ut talem, qualem meditabar et mente concipiebam, indicem luci committam, vereor ne in vituperia magis quam laudes incurram. Nam redundare multa multis videbuntur, deesse non pauca. Et quanquam majorem in accuratione quam in copia laborem collocavi, non dubito, quin etiam in hac saepe aliquid desideretur. Haec imbecillitati condonabis humanae, Lector, et benevole emendabis. Neque tamen inutile aliquid suscepisse mihi videor, nec ut inanem gloriolam inde auspicatus fuisse arguerer. Haec enim exigua omnino erit in ejusmodi opere, quod ingenii parum, assiduitatis aliquid exegisse videbitur, et quod longe plurimi unius tantum lineolae quaerendae causa evolvent, quam si recte constitutam invenerint, id flocci facient, sin falsam aut incongruam, graviter vituperabunt. Ut vero in unum locum redacta habeatur omnis hujus historiae literatura, ut facili negotio reperiri possit, quid de unaquaque re jam scri ptum sit et quid adhuc desit, quam variae denique sint res ad hanc historiam facientes, hanc putabam fore hujus libelli vim et usum. Aut enim omnino dereliquenda est medicinae et scientiae naturalis historia, aut prudenter haurienda e fontibus puris et copiosis. Hac ex causa non delectum dare volui, sed quoad id fieri potuit, plenam literaturam, additis interdum judiciis cautis et argumentis brevissimis. Omisi, paucis exceptis, Vitas singulas medicorum singulorum et Bibliothecas medicas privatas, cum vix unquam aliquis haec plene enumerare posset et in majorem, quam par est, liber molem inde incre visset. Et quamvis libros de historia epidemiarum majorum et morborum singulorum plenius enumeraverim, abstinui tamen ab indicandis ejusmodi libris, qui epidemias singulas hoc vel illo anno grassatas tractant, idque eo lubentius feci, cum Haeserus, Professor Jenensis, optime jam de epidemiarum studio meritus, chronologicum epidemiographorum indicem prelo paratum habeat. Ceterum haec bibliotheca medico-historica non solum medicinam hominis et animalium domesticorum, sed simul omnem rerum naturalium cognitionem complectitur, uti physicen, chemiam, mineralogiam, botanicen, zoologiam, quae quamvis in arte facienda singularem usum habere non videantur, a medica tamen doctrina separari neque debent, neque etiam possunt. Scribebam Dresdae, mense Junio MDCCCXLII. L. Ch. |