Wi' sword and targe into their hand,
Wi' which they were na slaw, man;
Wi' mony a fearfu' heavy sigh,
The lads began to claw, then.
Ower bush, ower bank, ower ditch, ower stank,
She flang amang them a', man;
The butter-box gat mony knocks;
Their riggings paid for a', then.
They got their paiks wi' sudden straiks,
Which, to their grief, they saw, man;
Wi' clinkum-clankum ower their crowns,
The lads began to fa', then.
Her leap'd about, her skipp'd about,
And flang amang them a', man;
The English blades got broken heads,
Their crowns were cleaved in twa, then;
The durk and dour made their last hour,
And proved their final fa', man;
They thocht the devil had been there,
That play'd them sic a pa', man.
The Solemn League and Covenant
Cam' whigging up the hill, man;
Thocht Highland trews durst not refuse
For to subscribe their bill, then :
In Willie's name they thocht nae ane
Durst stop their course at a', man;
But her-nain-sell, wi' mony a knock,
Cried, Furich, Whigs, awa', man.
Sir Evan Dhu and his men true
Cam' linking up the brink, man;
The Hoggan Dutch, they feared such,
They bred a horrid stink, then.
The true Maclean and his fierce men
Cam' in amang them a', man :
Nane durst withstand his heavy hand;
A' fled and ran awa', then.
Och on a righ! och on a righ!
Why should she lose king Shames, man?
Och rig in di! och rig in di!
She shall break a' her banes, then ;
With furichinich, and stay a while,
And speak a word or twa, man;
She's gi'e ye a straik out ower the neck
Before ye win awa', then.
Oh, fie for shame, ye're three for ane!
Her-nain-sell's won the day, man;
King Shames' red-coats should be hung up,
Because they ran awa', then.
Had they bent their bows like Highland trews,
And made as lang a stay, man,
They'd saved their king, that sacred thing,
And Willie 'd run awa', then.
Killiecrankie- one of the loveliest as well as grandest spots in Scotland—is celebrated as the place where General Hugh Mackay of Scoury, the able general of King William III., was defeated by the gallant Viscount Dundee, the "Claverhouse" of popular tradition. Dundee lost his life, and Mackay the battle.
It was a' for our richtfu' king
We left fair Scotland's strand;
It was a' for our richtfu' king
We e'er saw Irish land, my dear,
We e'er saw Irish land.
Now a' is done that men can do,
And a' is done in vain :
My love, my native land, farewell;
For I maun cross the main, my dear,
For I maun cross the main.
He turn'd him richt and round about
Upon the Irish shore,
And ga'e his bridle-reins a shake,
With, Adieu for evermore, my love,
With, Adieu for evermore.
The sodger frae the war returns,
The sailor frae the main ;
But I hae parted frae my love,
Never to meet again, my love,
Never to meet again.
When day is gane, and nicht is come,
And a' folk bound to sleep,
I think on him that's far awa'
The lee-lang night, and weep, my dear, The lee-lang night, and weep.
"TWAS on a Monday morning,
Richt early in the year,
That Charlie cam' to our toun,
The young Chevalier.
And Charlie he's my darling,
My darling, my darling;
Charlie he's my darling,
The young Chevalier.
As he was walking up the street,
The city for to view,
Oh, there he spied a bonnie lass
The window looking through.
Sae licht's he jumped up the stair,
And tirl'd at the pin ;
And wha sae ready as hersel'
To let the laddie in!
He set his Jenny on his knee,
All in his Highland dress;
For brawly weel he kenn'd the way
To please a bonnie lass.
It's up yon heathery mountain,
And down yon scroggy glen,
We daurna gang a-milking
For Charlie and his men.
And Charlie he's my darling,
My darling, my darling;
And Charlie he's my darling,
The young Chevalier.
From "Hogg's Jacobite Relics," 1821. Air-" Up and waur them a', Willie."
WHEN We went to the field o' war,
And to the weaponshaw, Willie,
Wi' true design to serve our king,
And chase our faes awa', Willie ;
Lairds and lords came there bedeen,
And wow gin they were sma', Willie,
While pipers play'd frae right to left,
Fy, furich Whigs awa', Willie.
Up and waur them a', Willie,
Up and waur them a', Willie
Up and sell your sour milk,
And dance, and ding them a', Willie.
And when our army was drawn up,
The bravest e'er I saw, Willie,
We did not doubt to rax the rout,
And win the day and a', Willie.
Out-owre the brae it was nae play
To get sae hard a fa', Willie,
While pipers play frae right to left,
Fy, furich Whigs awa', Willie.
Up and waur, &c.
But when our standard was set up,
So fierce the wind did blaw, Willie,
The golden knop down from the top
Unto the ground did fa', Willie.
Then second-sighted Sandy said,
We'll do nae gude at a', Willie,
While pipers play'd frae right to left,
Fy, furich Whigs awa', Willie.
When brawly they attack'd our left,
Our front, and flank, and a', Willie,
Our bauld commander on the green
Our faes their left did ca', Willie.
And there the greatest slaughter made
That e'er poor Tonald saw, Willie,
While pipers play'd frae right to left,
Fy, furich Whigs awa', Willie.
First when they saw our Highland mob,
They swore they'd slay us a',
Willie ;
And yet ane fyl'd his breeks for fear,
And so did rin awa', Willie.
We drave them back to Bonnybrigs,
Dragoons, and foot, and a', Willie,
While pipers play'd frae right to left,
Fy, furich Whigs awa', Willie.
Up and waur, &c.
But when their general view'd our lines,
And them in order saw, Willie,
He straight did march into the town,
And back his left did draw, Willie.
Thus we taught them the better gate
To get a better fa', Willie,
While pipers play'd frae right to left,
Fy, furich Whigs awa', Willie.
And then we rallied on the hills,
And bravely up did draw, Willie ;
But gin ye speer wha wan the day,
I'll tell ye what I saw, Willie:
We baith did fight, and baith were beat,
And baith did rin awa', Willie ;
So there's my canty Highland sang
About the thing I saw, Willie.
|